Білімді ұрпақ қалыптастыру үшін мемлекет тарапынан да тиісті көңіл бөлінуде. Өңірлерде жыл сайын жаңа мектептер пайдалануға берілуде. Заманауи технологиялармен жабдықталған білім ошақтары оқушылардың сапалы білім алуына да жағдай жасайды. Дей тұрғанмен, кейбір ауылдарда апатты жағдайдағы мектептер әлі де баршылық.
Жамбыл облысында бүгінде апатты деп танылған 5 мектеп бар. Қордай ауданының Соғанды ауылындағы №33, Көктөбе ауылындағы №40 және Күнбатыс ауылындағы №11 негізгі мектептер апатты жағдайда. Сондай-ақ Талас ауданының Қасқабұлақ ауылындағы Қасқабұлақ орта мектебі мен Т.Рысқұлов ауданының Жалпақсаз ауылындағы Жалпақсаз бастауыш мектебі де апатты деп танылған. Барлық мәселені бір күнде шешу мүмкін емес, дегенмен де мұның бәрі ата-аналар мен оқушылардың алаңдаушылығын тудырмай қоймайды. Оның үстіне биыл Әулиеата өңірінде соңғы жарты ғасырда болмаған қыс болды. Сол кездері Мойынқұм ауданының біраз ауылдарындағы мектептерде сабақ тоқтатылды. Ал осындай кезде апатты мектепте оқып жатқан балалардың жайын елестету қиын.
Облыстық білім басқармасы басшысының орынбасары Жәмилә Бекбатырованың айтуынша, апатты мектептерді жою үшін тиісті жұмыстар жүргізіліп жатыр. Нақты айтсақ, Қордай ауданының Соғанды және Көктөбе ауылдарындағы әрқайсысы 50 орындық негізгі мектептер мен Талас ауданының Қасқабұлақ ауылындағы 120 орындық Қасқабұлақ орта мектебінің құрылысы ағымдағы жылы аяқталады деп жоспарлануда.
Аталған 3 мектептің құрылысы биыл аяқталғанымен, қалған 2 мектептің жайы кейінге қалып тұр. Т.Рысқұлов ауданының Жалпақсаз ауылындағы Жалпақсаз орта мектебінің құрылысы ағымдағы жылы басталып, келесі жылы аяқталмақ. Ал Қордай ауданының Күнбатыс ауылындағы №11 негізгі орта мектептің мәселесі 2019-2020 жылдарға қарай шешілмек. Оған дейін оқушылар апатты мектептерде білім алуға мәжбүр.
Сонымен қатар Тараз қаласындағы №24 және №55 орта мектептер, Байзақ ауданы, Байзақ ауылындағы Сыдық Абланов атындағы орта мектеп пен аталған ауданның Ақшолақ стансасындағы Ақшолақ орта мектептері де бүгінде үш ауысымда жұмыс істейтін мектептер қатарында. Үш ауысымда білім беретін 3 мектептің құрылысы ағымдағы жылы аяқталса, Ақшолақ орта мектебінің құрылысы биыл жергілікті бюджет есебінен басталып, келесі жылы аяқталады екен.
Облыстық білім басқармасының мәліметінде көрсетілген деректер алдағы уақыттарда толығымен іске асатын болса, екі жылдан кейін өңірде апатты деп танылған және үш ауысымда білім беретін мектептердің мәселесі шешіледі. Ауылдардағы білім ошақтарының жай-күйі шешілген жағдайда ғана білім саласындағы серпінділігіміз арта түспек.
Хамит ЕСАМАН,
«Егемен Қазақстан»
Жамбыл облысы
